नेपाल प्रशासनिक प्रशिक्षण प्रतिष्ठानको प्रशिक्षण परिषद (Governing Council) को ७१ औँ बैठक  संघीय मामिला तथा सामान्य प्रशासन मन्त्री एवम् परिषदका अध्यक्ष माननीय राजकुमार गुप्ताज्यूको अध्यक्षतामा मिति २०८१/४/१६ गतेका दिन सम्पन्न भयो । प्रशिक्षण परिषद प्रतिष्ठानको सर्वोच्च निकाय हो जसले प्रतिष्ठानको समग्र नीतिगत नेतृत्वदायी भूमिका अनुरूप दीर्घकालीन योजना, वार्षिक योजना तथा कार्यक्रम र बजेट स्वीकृत गर्ने, प्रगति समिक्षा गर्ने र प्रतिष्ठानलाई आवश्यक नीति नियम बनाउने लगायत नेपाल प्रशासनिक प्रशिक्षण प्रतिष्ठान ऐन, २०३९ ले तोकेबमोजिमको जिम्मेवारी निर्वाह गर्दछ । परिषदमा राष्ट्रिय योजना आयोगका उपाध्यक्ष, लोक सेवा आयोगका अध्यक्ष, त्रिभुवन विश्वविद्यालयका उपकुलपति, नेपाल सरकारका मुख्य सचिव, संघीय मामिला तथा सामान्य प्रशासन मन्त्रालयका सचिव र अर्थ मन्त्रालयका सचिव पदेन सदस्य हुने र प्रतिष्ठानका कार्यकारी निर्देशक सदस्य सचिव हुने व्यवस्था रहेको छ । परिषद बैठकमा प्रतिष्ठानको रणनीतिक योजना (२०७९/८०-८३/८४) को दोस्रो वार्षिक प्रगति समिक्षा एवं आ.व. २०८०/८१ को वार्षिक प्रगति समिक्षा गरियो र चालु आ.व. २०८१/८२ का लागि प्रस्तावित वार्षिक कार्यक्रम तथा बजेट स्वीकृत गरियो । बैठकको अन्त्यमा, संघीय मामिला तथा सामान्य प्रशासन मन्त्रालयका सचिव श्री मुकुन्दप्रसाद निरौलालाई नेपाल सरकारको निर्णयानुसार परिवर्तित जिम्मेवारीका लागि शुभकामना एवम् परिषद सदस्यका रूपमा प्रतिष्ठानलाई पुर्याउनुभएको योगदानको लागि धन्यवाद ज्ञापन गरियो ।