नेपाल प्रशासनिक प्रशिक्षण प्रतिष्ठानको ३९ औं बार्षिक उत्सव स्वास्थ्य मापदण्डको पालना सहित प्रतिष्ठानको अडिटोरियम हलमा आज एक बिशेष समारोह आयोजना गर्दै सम्पन्न भयो । राष्ट्रियगान गायनका साथमा सुरूवात भएको उक्त कार्यक्रमको औपचारिक समुद्घाटन प्रतिष्ठानका कार्यकारी निर्देशक तथा नेपाल सरकारका पुर्व सचिव डा. राजन खनालले पानसमा दियो बालेर गर्नुभएको थियो ।
कार्यक्रममा स्वागत मन्तव्य तथा प्रतिष्ठानको बार्षिक प्रगति विवरणको समिक्षा गर्दै प्रतिष्ठानका उप-कार्यकारी निर्देशक तथा नेपाल सरकारका पुर्वसचिव श्री विष्णुप्रसाद लम्सालले प्रतिष्ठानलार्इ यस अवस्थामा ल्याइपुर्याउने सम्मुर्ण अग्रजहरू तथा प्रतिष्ठानका पुर्व कर्मचारीहरूलाइ सम्मानका साथ स्मरण गर्दै कोभिड-१९ को महामारीका बीचमा पनि हामीले जे जति प्रगति गर्न सक्यौं, ती सबै हाम्रा संयुक्त प्रयासले भएका हुन् र यो प्रयासमा प्रतिष्ठानको संघीयता अध्ययन केन्द्रले यस प्रगतिमा ईंटा थप्ने कार्य गरेको बताउँदै सबै कर्मचारीहरूको निशर्त सहयोगले मात्र प्रतिष्ठानलाइ गति प्रदान गर्दै नेपालकै एक उदाहरणिय संस्थाकारूपमा उभ्याउन सकिने बिस्वास व्यक्त गर्नुभयो ।
कार्यक्रममा गत आर्थिक बर्षदेखि अवकाश प्राप्त गरेका प्रतिष्ठानका कर्मचारीहरूलाइ कोभिड-१९ का कारणले बिदाइ गर्न नसकिएकोमा ३९ औं बार्षिक उत्सवका अवसरमा अवकाश प्राप्त कर्मचारीहरू वहिनीमैया प्रधान, सुन्दरराज दुवाल र मनोजमान चिपालुलाइ प्रतिष्ठानका कार्यकारी निर्देशक डा. राजन खनालले सम्मानपत्र र दोसल्ला ओढाएर सम्मान गर्दै बिदाइ गर्नुभयो । कार्यक्रममा ३९ औं बार्षिक उत्सवका अवसरमा आयोजित विभिन्न अतिरिक्त कृयाकलापमा सहभागि भएर प्रथम र द्वीतिय स्थान हासिल गर्ने कर्मचारीहरूलाइ प्रतिष्ठानका कार्यकारी निर्देशक डा. खनालले पदक तथा प्रमाणपत्र वितरण गर्नुभयो । उक्त कार्यक्रममा गत आर्थिक बर्षमा उत्कृष्ट कार्यसम्पादन गर्ने कर्मचारीहरू श्री ताराप्रसाद खरेल, श्री प्रमोद निरौला, श्री अनु सेढाँई र श्री रामभाई देसारलाई प्रतिष्ठानका कार्यकारी निर्देशक डा. खनालले नगद पुरस्कार प्रदान गर्दै सम्मान पत्र प्रदान गर्नुभयो ।
समापन मन्तव्य राख्दै प्रतिष्ठानका कार्यकारी निर्देशक डा. खनालले आजको दिन हौसला प्राप्त गर्ने दिन भएकाले सबै कर्मचारीहरूलाइ बधार्इ ज्ञापन गर्नुभयो । उहाँले पुर्व कर्मचारीहरूले प्रतिष्ठानको स्थापना देखि यो अवस्था सम्म ल्याइपुर्याउन गर्नुभएको योगदानको स्मरण गर्दै कोभिड महामारीको कठिन परिस्थितीमा पनि हामी सबैको संयुक्त प्रयासले प्रशिक्षण, अनुसन्धान र परामर्शका कार्यहरू गर्न सक्षम भयौं, यस्तो कठिन परिस्थितीमा पनि प्रशिक्षण लगायतका कार्यहरू सुचारू राखेर हामीले यस प्रतिष्ठानको औचित्य स्थापित गर्न सक्षम भयौं भन्ने बताउँदै संस्था पहिलो हो र हामी दोस्रो हौं, संस्थाको अस्तित्वसँग हाम्रो अस्तित्व पनि जोडिएकाले यस प्रतिष्ठानको थप प्रगतिका लागि आजबाटै प्रतिबद्धता सहित प्रयत्न जारी राखौं भन्ने बताउनुभयो । साथै उहाँले अवकाश प्राप्त कर्मचारीहरूको सुस्वास्थ्य र उत्तरोत्तर प्रगतिको पनि कामना गर्नुभयो ।
